24.09.2025
Barnat me lëndë aktive Paracetamol mund të përdoren gjatë shtatzënisë, në përputhje me rekomandimet zyrtare.

Në BE, paracetamoli (i njohur edhe si acetaminofen) mund të përdoret për të ulur dhimbjen ose temperaturën gjatë shtatzënisë nëse është klinikisht e nevojshme. Aktualisht nuk ka prova të reja që do të kërkonin ndryshime në rekomandimet aktuale të BE-së për përdorim.

Siç përfshihet në informacionin e produktit për paracetamolin në BE, një sasi e madhe e të dhënave nga gratë shtatzëna që përdorën paracetamol gjatë shtatzënisë tregon se nuk ka rrezik për keqformime në fetusin në zhvillim ose tek të porsalindurit.

Në vitin 2019, Agjencia Europiane e Barnave (EMA) shqyrtoi studimet e disponueshme që hetuan zhvillimin neurologjik të fëmijëve të ekspozuar ndaj paracetamolit në mitër dhe zbuloi se rezultatet ishin të paqarta dhe se nuk mund të përcaktohej asnjë lidhje me çrregullimet neurologjike të zhvillimit.

Kur është e nevojshme, paracetamoli mund të përdoret gjatë shtatzënisë. Ashtu si me çdo bar për trajtim akut, ai duhet të përdoret në dozën më të ulët efektive, për kohën më të shkurtër të mundshme dhe sa më rrallë të jetë e mundur.

Gratë shtatzëna duhet të flasin me profesionistin e tyre të kujdesit shëndetësor nëse kanë pyetje në lidhje me ndonjë bar gjatë shtatzënisë.

Si për të gjitha barnat, EMA dhe autoritetet kompetente kombëtare në BE do të vazhdojnë të monitorojnë sigurinë e barnave që përmbajnë paracetamol dhe të vlerësojnë menjëherë çdo të dhënë të re sapo të dalë. Do të merren masa rregullatore sipas nevojës për të mbrojtur shëndetin publik.

Raportimi i efekteve të padëshiruara të dyshuara është shumë rëndësishëm. Ai lejon monitorimin e vazhdueshëm të bilancit risk/përfitim të barit. Profesionistët e kujdesit shëndetësor duhet të raportojnë çdo efekt të padëshiruar të dyshuar nëpërmjet sistemit kombëtar të raportimit në faqen zyrtare të AKBPM.  https://vigiflow-eforms.who-umc.org/al/aladr